Nyiricyubahiro Antoine Cardinal Kambanda, tariki ya 27 Mata 2024 mu murwa mukuru wa Polonye, yifatanyije n’Abanyarwanda mu Gitambo cy’Ukaristiya basabiramo bnibuka ku nshuro ya 30 jenoside yakorewe Abatutsi mu 1994.
Icyo gikorwa cyateguwe na Ambassade y’U Rwanda muri Pologne gihuriza hamwe abanyarwanda baba muri icyo gihugu ndetse ndetse n’inshuti zabo.
Mu Kwibuka Jenoside yakorewe Abatutsi mu 1994, hanashimwe ababashije kwitangira abandi no kubarokora urupfu, muri bo hari nka Padiri w’umunyapolonye, Stanislas Urbaniak, wagizwe umurinzi w’igihango kuko yarokoye abahigwaga bagera kuri 600 muri Paruwasi ya Ruhango Diyosezi Kabgayi.
Ubutumwa bwose bwatanzwe bukaba bwibanze ku kwamagana Jenoside n’ingengabitekerezo yayo, kwimakaza umuco w’amahoro, guharanira ubwiyunge no gukora cyane ngo u Rwanda rukomeze kwihuta mu iterambere.
Aha yasabiraga Abatutsi bishwe muri Jenoside
Antoine Cardinal Kambanda yashimiye cyane urubyiruko rw’u Rwanda rwinshi rwari rwitabiriye iki gitambo cya Misa cyateguwe mu rwego rwo kwibuka abishwe muri Jenoside yakorewe Abatutsi.
Yagize ati “Nishimye cyane kubona nk’urubyiruko rw’abanyeshuri b’Abanyarwanda mwarakomeje indangagaciro z’Abanyarwanda n’iza Kiliziya. Kuba mwitabira ibikorwa Ambasade ibatumiramo, mukaza no gusenga Imana, ni byiza cyane, kandi mukaniga neza.”
Abanyeshuri bafashe ifoto y’urwibutso na cardinal
Ambasaderi w’u Rwanda muri Pologne, Prof. Shyaka Anastase, witabiriye iki gitambo cya Misa n’itsinda ry’abandi bakozi muri Ambasade y’u Rwanda, yashimiye Cardinal Kambanda ku bwo kwifatanya n’Abanyarwanda bo muri icyo gihugu mu gikorwa cyo kwibuka.
Ati “Turashimira Cardinal Antoine Kambanda, ko mu mirimo ye yamuzanye muri iki guhugu, yatuboneye iyi minsi ibiri. Twari kumwe Ejo mu kwibuka abishwe muri Jenoside yakorewe Abatutsi, none n’uyu munsi twabanye na we muri iki gitambo cya Misa ngarukakwezi y’Ikinyarwanda hano Varsovie.”
Cardinal amaze iminsi afite uruzinduko muri Pologne
Amb. Shyaka yashimiye urubyiruko rw’abakirisitu ababwira ko iyo bahuye inyungu aba atari ugusenga gusa, ahubwo haba harimo no guhura ngo bashyigikirane nk’Abanyarwanda.
Ambasaderi Shyaka Anastase na Cardinal Antoine Kambanda bashimiye Padiri Ukurikiyimfura Walter wa Diyosezi ya Byumba uri mu banyeshuri biga muri Kaminuza muri Pologne, uko ahuza uru rubyiruko rw’abanyarwanda muri ibi bikorwa bibera muri iyi Paruwasi.
Umwe mu bahagarariye urubyiruko Gatolika rw’Abanyarwanda i Varsovie, Alain Musana Ndagijimana, yashimye umwanya bahawe muri iki gitambo cya Misa.
Ati “Ni amahirwe kuba uyu munsi turi kumwe na Cardinal Antoine Kambanda watwigishije muri iyi Misa yo kwibuka Abatutsi bishwe muri Jenoside 1994.
